عايز تعمل فورمة Thanos

عايز تعمل فورمة Thanos ? 🧐🤘

طب هقولك علي كام حاجة عشان يبقي مصيرك محتوم فعلاً في مجال التمرين 🤩

عوامل لازم نمشي عليها عشان خاطر تعمل فعلاً فورمة محترمة ويبقي جسمك صحياً كويس جداً و شكلاً يبقي مظبوط ومتناسق 💥

العوامل ديه بتنقسم لـ ٦ احجار لازم تتعب عشان تعملهم وبعد كدة هتلاقي نفسك بسهولة انك تطرقع صباعك وتعمل فورمتك 😎
وديه الخلاصة

١- الصحة 🛑

حاول تبقي محافظ علي صحتك بقدر الإمكان من ناحية حاجات كتيرة جداً ،، زي التدخين الـ بيعوق امتصاص الحديد ،، بيعوق عملية التنفس والتنفس ده شيء اساسي جداً فوق ما تتخيل اثناء التمرين وليه عامل مهم ،، وغير كدة انت مش متخيل الشوائب الـ بتبقي في دمك عاملة ازاي من التدخين واضرار كتيرة جداً 🤯
+
العادات الغير صحية ،، تحاول تقلل منها عشان ليه تأثير جداً علي نشاط جسمك ومستويات الهرمون وخصوصاً الهرمون لأن هو المسئول عن تكوين العضلات وضخامتها 🤘
فا كل ده بيفرق جداً وشوف ايه الفعل الغير صحي وابعد عنه ✅

————————-

٢- النوم 🛑

وده اهم حاجة بالنسبالي ،، سواء انت بتدور علي الضخامة العضلية ،، ضخامة في الوزن والعضلات ،، بتخسس ،، بتنشف جسمك من الدهون ،، مفتاح كل ده النوم وعلي الأقل من ٦ الي ٨ ساعات يومياً ،، وده ليه عامل في حاجات كتير اهمهم ان جسمك بيعمل حاجة اسمها اعادة ترميم ( recovery ) 💥
جسمك بيبتدي يرمم كل حاجة اثناء فترة النوم ! ذكائك وقوتك الجسدية والعقلية بيتحول للأفضل اثناء فترة النوم ،، فا تأكد ان مش هيبقي في تطور لو انت مبتنامش كويس حتي لو معاك باقي الاحجار لأن للأسف لو طرقعت صباعك برده ! مش هتعمل الفورمة الـ انت عايزها وتبقي ROCKSTAR فعلاً 🤯

————————-

٣- الإرادة 🛑

انا مقتنع تماماً ان لو مفيش سبب هادف يخليك تنزل الجيم حتي لو نزلت الجيم ! انك مش هتكمل او مش هتعمل الهدف الـ انت عايزه ،، وهي ديه الإرادة 🤯

انا بنزل جيم ليه ؟ شكل حلو ؟ عايز اخس ؟ عايز ابقي موديل ؟ عايز اخش بطولات ؟ عايز صحتي تتحسن ؟

الاهداف ديه كلها هي الـ بتخلي البني ادم مننا يتعب جداً في التمرين ويمشي علي جدول ويحرم نفسه من اكل معين عشان نتيجة معينة ،، يتمرن في عز الشتا وميهمهوش !
ارادة هي ان انا بكمل وعندي هدف عشان ١ ، ٢ ، ٣
معندكش الارادة ديه ! يبقي برده مش هتبقي متمكن انك تعمل نتيجة مبهرة ليك ❌ فا افتكر كويس جداً ارادتك هي الـ هتخليك تحقق هدفك .

————————-

٤- الراحة النفسية 🛑

الموضوع ده معظمنا بيعاني منه ممكن بسبب الشغل والحياة العملية ،، الناس الـ بتدرس والـ شغال وهكذا 💥

وبصراحة مش هقولكم ان سهل تخلي صحتك النفسية كويسة ،، بس حاول بقدر الإمكان انك متفكرش طول ما انت قاعد بحاجات تزعل او تضايق او تحبطك ،، وانت رايح الجيم ؟ خد معاك شنطة وسيب فيها النفسية الوحشة واطلع اتمرن 🤩 هرمون السعادة هيخليك وانت نازل من الجيم هتنسي تاخد معاك الشنطة اصلاً وانت مروح البيت !

الراحة النفسية هي من اسباب الضخامة العضلية وعدم هدم الخلايا العضلية ✅
انت متضايق مثلاً من الشغل ! فكر في الحاجة الـ انت حاببها ! ان عايز اعمل فورمة ممتازة ! يبقي علطول انسي الـ بيضايقك وفكر انت عايز توصل لأيه ؟ لأن راحتك النفسية من الأحجار الستة المهمين جداً 🤩✅

————————-

٥- التمرين 🛑

اهي ديه اهم نقطة بقي 🤯
خلي بالك ان التمرين عامل اساسي في ضخامة العضلات ومش بمجرد انك تمسك الوزن و ١٢٣٤ !!

لا ،، التمرين بتاعك لازم يبقي متنوع ومميز جداً ،، لازم لما تيجي تتمرن تمشي علي شوية مفاتيح كدة هي الـ هتفرق معاك فا الضخامة العضلية ،، اهمهم 🤘 :

- التركيز في العضلة المستهدفة 💥 : انك مركز جداً في انقباض وانبساط العضلة معاك ، دماغك كلها في العضلة وبتحس بيها حرفياً وهي بتتقطع ،، معظمنا بيتمرن وهو اصلاً بيفكر في مشكلة حصلت معاه او عاملين اكل ايه النهاردة ! 🤯
الكلام ده مينفعش تماماً ،، لازم تبقي مركز كويس جداً عشان الموضوع ده هيفرق معاك في النضوج العضلي ✅

- التنويع 💥 : خليك كل فترة اسبوعين كحد اقصي بتغير التمرينة بتاعتك ،، بتغير ترتيبهم ،، بتغير اوزانك ! فا متخليش عضلاتك تبقي ماشية علي روتين ممل عشان يبقي في تطور وانتقال لمرحلة جديدة لأن معظم الناس بتمشي علي الجداول بتاعتها بالشهرين وبالتلات شهور 🧐

- التكنيك 💥 : الاداء الحركي بتاعك ،، لازم تبقي عارف تكنيك تمرين البار الفلات مثلاً لعضلة الصدر ،، لازم تبقي عارف التكنيك الصحيح ازاي مش مجرد انك بتمسك بار وبتحرك ايدك ! ❌

لازم تهتم بالحركة الأيجابية والحركة السلبية الـ هما انك تطلع بالبار علي مهلك في ٣ ثواني وتنزل في ٣ ثواني وتحس بأنقباض وانبساط العضلة معاك لأن الموضوع بيفرق جداً عن انك بتنزل وتطلع بالبار بسرعة لمجرد تأدية الغرض ✅

————————-

٦ - الأكل 🛑

من الأخر وخلاصة الأكل ،، لازم تعرف انت يومياً محتاج قد ايه سعرات حرارية يومياً وقد ايه بروتين و قد ايه كارب وقد ايه دهون ✅

ولما تعرف النسب ديه تعمل علي انك تدخلها يومياً بنفس المقدار ، لازم تعمل جدول لأكلك مع التنويع في الاكل وده مهم جداً جداً 🤯

ماشي علي ضخامة او تخسيس او تنشيف يبقي لازم اكل 🤘
بس بتختلف في الاصناف والمقادير وده بيرجع للكميات الـ انت هتدخلها جسمك ،، لازم تهتم بأكلك كويس جداً فوق ما تتخيل ،، يعني مثلاً عايز ضخامة في الوزن والعضلات ! يبقي متعديش ٣ ساعات من غير ما تاكل وجبة ✅

اكلك يكون صحي ! بلاش الاكل الكتير من برة لأن ده بيسبب بمشاكل بعد كدة علي المدي البعيد !

لأن كل حاجة في جسمك بترتبط بنوع معين من الأكل زي 💥 : ضخامة عضلية يعني بروتين - زيادة وزن يعني سعرات - طاقة للتمرين يعني كاربوهيدرات - اعصاب ممتازة يعني فيتامين ب وهكذا .....

وبكدة انت جمعت الـ ٦ احجار وطرقع صباعك واعمل فورمتك و يارب تكون استفادت بالمقال